КЕҢЕС ОДАҒЫНЫҢ БАТЫРЫ АЙТҚҰЛОВ СӘЛІМ НИГМЕТҰЛЫНЫҢ ТУҒАНЫНА 110 ЖЫЛ!

Сіздердің назарларыңызға, Айткулов Сәлім Нигметұлының 110 жылдық мерейтойына арналған оның өмірі мен еңбек жолына байланысты құжаттардың электрондық көрмесін ұсынамыз.

Айтқұлов Сәлім Нигметұлы 1913 жылы Батыс Қазақстан облысы Жаңақала ауданы Мухорок ауылында кедей шаруа отбасында дүниеге келген. Ата-анасы революциядан бұрын және революциядан кейін шаруашылықпен айналысқан. Әкесі Нигмет Айтқұлов азаматтық соғыс кезінде қайтыс болды.

1927 жылы әкесі қайтыс болғаннан кейін ағасы Кәрім Айтқұловтың тәрбиесінде болды.

1927-1930 жылдары Орал қаласында № 2 балалар үйінде тәрбиеленді. Осы уақыт аралығында ол қала мектебін бітірді.

1930 жылы ол Орал ауылшаруашылық техникумына түсіп, онда 1932 жылға дейін оқыды. 1932 жылы ауыруына байланысты оқуды тастап, жұмыс істеп бастайды. 1932-1940 жылдар аралығында облыстық мемлекеттік комитетінде есепші қызметін атқарады.

1941-1945 жылдардағы Ұлы Отан соғысының ардагері, Кеңес Одағының батыры, Ленин орденімен медалін және батылдық үшін алтын жұлдызымен марапатталған.

1943 жылы 29 қыркүйекте Днепр үшін болған ұрыста 231-гвардиялық атқыштар полкінің кіші лейтенанты Айтқұлов басқарған взвод жаудың 9 шабуылына тойтарыс берді және 4 рет қарсы шабуылға шықты, жаудың 2 взводын жойды. 6 қазанда жараланғанына қарамастан, Айтқұлов өз взводын жау қоршауынан алып шықты. Жеңіс күнін Польша жерінде қарсы алып, елге оралған.

Кеңес әскері қатарынан келгеннен кейін, облыстық партия комитеті С.Н.Айтқұловты Батыс Қазақстан облысы тұтынушылар одағына жұмысқа жібереді, облыстық тұтыну одағының Басқарма төрағасының кадрлар жөніндегі орынбасары лауазымында жұмыс істеді.

1950 жылы 6 айлық тұтынушылық кәсіподақ басшыларын қайта даярлау курсынан өтті.

С.Н.Айтқұлов көп жылдар бойы облыстық тұтынушылар одағында жұмыс жасаған, жұмысқа адал, өзіне және жұмысшыларына талап еткен, жұмысын ұқыпты орындаған.

Қазіргі таңда Айтқұлов Сәлім Нигметұлы атына Жаңақала ауданында, сонымен қатар БҚО Зашаған кенті, Сарытау шағын ауданында Сәлім Айтқұлов көшесі берілген.

Көрменің негізгі мақсаты: Кеңес одағының батыры Айткулов Сәлімнің туғанына 110 жыл толуына орай өмірбаяны мен еңбек жолына шолу жасау.

Міндеттері:

- өлке тарихын зерттеудің дереккөзі ретінде архивтік құжаттарды ұсыну;

- Жерлесіміз С.Айткуловтың өмірбаянымен таныстыру;

- өлке тарихына құрмет сезімін қалыптастыру.