Батыс Қазақстан облысы мемлекеттік архивінде «Архив және болашақ ұрпақ» жобасы аясында студенттерге арналған «Ашық есік» күні өтті.

     Ағымдағы жылдың қыркүйек айының жиырма бірінші жұлдызында Қазақстан Республикасы Мәдениет және спорт министірлігінің Архив, құжаттама және кітап ісі комитетінің «Архив және болашақ ұрпақ» жобасы аясында Батыс Қазақстан облысының мемлекеттік архивінің ұйымдастыруымен студенттерге ашық есік күні өтті. Шараға Батыс Қазақстан инновациялық-технологиялық және М. Өтемісов атындағы Батыс Қазақстан мемлекеттік университетінің тарих мамандығының 2-3 курс студенттері қатысты.

     Аталмыш шараның басты мақсаты- архив құжаттарын пайдалана отырып жас ұрпақтың санасында тарихқа деген сүйіспеншілікті арттыру, өскелең ұрпақты өлке тарихымен таныстыру. Студенттерге архив құжаттарын насихаттау. Болашақ ғалымдар ретінде ғылыми зерттеу жұмыстарына студенттерді тарту. Архив саласының қоғамға қажеттілігін, оның қоғамдағы рөлінің маңыздылығын көрсету.

      Шара барысында БҚО мәдениет, тілдерді дамыту және архив ісі басқармасы архив ісі бөлімінің басшысы Туремуратова Лаура Тулешовна кіріспе сөз сөйледі. Одан соң студенттер архив қызметкерлерінің жұмысымен танысты және архив қоймасына экскурсия жасады. Сонымен қатар, студенттер архив қызметкерлері дайындаған көрмені тамашалады. Көрмедегі архив тарихына қатысты шешімдер, алғашқы жұмыс жасаған мамандар, архив қызметкерлері және жетістіктері туралы көрмені көрген студенттердің таңданғанын әр жәдігерге терең үңілген жүздерінен жазбай тануға болады.

       Болашақ тарихшылар архивіміздің оқырман залында жұмыстану барысымен танысып, өз ойларымен бөлісе отырып, сұрақтарын қойды.